काठमाडौं । प्रहरीले रेशम चौधरीलाई पक्राउ गरेको छ।नागरिक उन्मुक्ति पार्टी (नाउपा) का संरक्षक रेशमलाई आज काठमाडौबाट  प्रहरीले पक्राउ गरेको हो।

रेशमलाई प्रहरीले जनमत पार्टीसँग आज हुने भनिएको एकताअघि उनलाई पक्राउ गरेको हो ।

पार्टी एकता कार्यक्रममा सहभागी हुन काठमाडौँस्थित प्रज्ञा भवन पुगेका चौधरीलाई पक्राउ गरिएको थियो । 

गत बिहीबार मात्र जनमत पार्टीका अध्यक्ष सीके राउतले एकता प्रक्रियालाई प्रभावित पार्न आफूलाई ज्यान मार्ने र रेशमजीलाई पुन: पक्राउ गराइदिने धम्की आएको दाबी गरेका थिए ।

सादा पोशाकका प्रहरीले पक्राउ गरेर रेशमलाई डिल्लीबजार कारागार लगेको हो । 

जिल्ला प्रहरी परिसर काठमाडौँका अनुसार  फैसला कार्यान्वयनका लागि रेशमलाई पक्राउ गरिएको जानकारी हो । पहिलेको मुद्दामा कैद भुक्तान हुन बाँकी रहेको  र सर्वोच्च अदालतको आदेश अनुसार रेशमलाई पक्राउ गरेका जिल्ला प्रहरी परिसर काठमाडौंले जानकारी दिएको छ।

सरकारको सिफारिसमा राष्ट्रपति रामचन्द्र पौडेलले गणतन्त्र दिवसको दिन चौधरीलाई बाँकी कैद मिनाहा गरिदिएका थिए । राष्ट्रपतिको सोही निर्णयविरुद्ध टीकापुर घटनामा मृत्यु भएका सशस्त्र प्रहरी निरीक्षक केशव बोहोराकी श्रीमती शारदा कडायतले सर्वोच्चमा रिट दर्ता गराएकी थिइन् ।