नेपालगञ्ज ।देशकै सबैभन्दा ठुलो गाउँपालिका बाँकेको राप्तीसोनारी गाउँपालिकाले गाउँसभाको पन्ध्रौं अधिवेशनमा नीति तथा कार्यक्रम र बजेट प्रस्तुत गरेको छ । गाउँपालिकाका अध्यक्ष तप्तबहादुर पौडेलले आगामी आर्थिक वर्ष २०८१-०८२ को नीति तथा कार्यक्रम र उपाध्यक्ष मनिषा सिंह थारुले बजेट प्रस्ततु गरिन् । राप्तीसोनारीले आगामी बजेट करीब ८६ करोड विनियोजन गरेको छ । यो चालू आर्थिक वर्षको भन्दा झण्डै तीन करोडले कम हो । 

उपाध्यक्ष थारुले आगामी आर्थिक बर्षका लागि ८५ करोड ८० लाख ८४ हजार रुपैयाँको बजेट विनियोजन गरेको जानकारी दिइन् । चालु खर्चतर्फ ५० करोड ६६ लाख ६५ हजार र पूंजीगत खर्चतर्फ ३५ करोड १४ लाख ३० हजार रुपैयाँ विनियोजन गरिएको छ । उनका अनुसार शिक्षातर्फ ३७ करोड ८४ लाख १७ हजार विनियोजन गरिएको छ । स्वास्थ्यतर्फ ७ करोड ७२ लाख २० हजार, कृषितर्फ १ करोड ६० लाख २० हजार, पशुतर्फ १ करोड २४ लाख २० हजार, महिलातर्फ २ करोड १ लाख, खानेपानीतर्फ ३० लाख, सहकारी तथा संघसंस्थातर्फ १० लाख, वन तथा वातावरणतर्फ ७ लाख, पञ्जीकरण तर्फ ४ लाख ९५ हजार, रोजगार सेवा केन्द्रतर्फ ५८ लाख ६४ हजार विनियोजन गरिएको छ । त्यसैगरी उद्यम विकासतर्फ १७ लाख, आवास कार्यक्रमतर्फ ३ करोड २ लाख, साझेदारी प्रवद्र्धन कोषका लागि २ लाख ५० हजार, स्वास्थ्य उपचार कोषका लागि २० लाख, सामाजिक विकास प्रबद्र्धन कोषका लागि २५ लाख र मर्मत सम्भार कोषका लागि २० लाख बजेट विनियोजन गरिएको छ । 

नीति तथा कार्यक्रम प्रस्तुत गर्दै अध्यक्ष पौडेलले कृषि, शिक्षा, स्वास्थ्य, पूर्वाधारलाई प्राथमिकता दिएर नीति तथा कार्यक्रम निर्माण गरिएको बताए । उनले जग्गाको खण्डीकरण र बाँझो राख्ने प्रवृत्तिलाई निरुत्साहित गर्न आवश्यक नीति निर्माण गरी कार्यान्वयन गरिने बताए । ऐलानी जग्गामा खेती गर्ने किसानहरुलाई कृषि सेवा सहुलियतको लागि उपयुक्त नीति निर्माण गरिने नीति तथा कार्यक्रममा उल्लेख छ । कृषि वीमालाई प्रभावकारी बनाउन बीमा कम्पनी र किसानसँग समन्वयात्मक संजाल कार्यक्रम गर्ने, सामूहिक खेती सञ्चालन कार्यक्रमलाई प्रोत्साहन गर्ने, महिला लक्षित कृषि प्रविधिमैत्री कार्यक्रम सञ्चालन गर्ने, वडा नम्बर २, ७, ८ र ९ मा दुग्ध उत्पादन समूह गठन गर्ने र बाख्रा स्रोत केन्द्र स्थापना गर्ने लगायतका कार्यक्रमलाई नीति तथा कार्यक्रमले जोड दिएको छ । 

कृषि तथा पशु विकास कार्यक्रममा दिइँदै आएको अनुदान वितरण प्रणालीलाई निरुत्साहित गर्दै गरिब परिवारले उत्पादन गरेका बस्तुहरु विक्री वितरण सहजीकरण गरिने पनि नीति तथा कार्यक्रमले समेटेको अध्यक्ष पौडेलले बताए । यसैगरी रोजगार बैंकको स्थापना गरी कामको खोजीमा रहेका बेरोजगार व्यक्तिहरुलाई सूचीकरणमा समावेश गराई प्राथमिकताको आधारमा रोजगारी सिर्जनाका कार्यक्रमहरु सञ्चालन गरी रोजगारीको न्यूनतम अवसरमा संलग्न गराइने पनि उल्लेख छ । मुक्तकमलहरी, द्वन्दपीडित व्यक्तिहरुको तथ्यांकहरु संकलन गर्ने र आवश्यक पर्ने कानुनी प्रवन्ध गरी उनीहरुलाई कृषि, शिक्षा, स्वास्थ्य एवम् सशक्तिकरण र आयआर्जनको क्षेत्रमा पहुँच अभिवृद्धि गरिने उल्लेख छ। 

पालिकाले आगामी आर्थिक वर्षमा शिक्षक दरवन्दी मिलान तथा पुनःवितरण गर्दै १० वर्षे गाउँ शिक्षा योजना निर्माण गरी कार्यान्वयनमा ल्याउने भएको छ । त्यसैगरी विद्यालयमा टिनको छानो विस्थापित गरी वातावरण अनुकूल तथा विद्यार्थीमैत्री बनाउने कार्यक्रमलाई निरन्तरता दिइने भएको छ । यसैगरी राप्तीसोनारी वडा नम्बर ८ मा २४ सै घण्टा वर्थिङ सेवा सञ्चालन गरिने भएको छ । प्रयोगशाला नभएका स्वास्थ्य संस्थाहरुमा गुणस्तरीय प्रविधिमैत्री प्रयोगशाला सञ्चालन गरिने, जेष्ठ नागरिक, असहाय शारीरिक अशक्त तथा दीर्घरोगीहरुका लागि गाउँपालिका अध्यक्षसँग विशेषज्ञ स्वास्थ्य शिविर सञ्चालन गरिने पनि नीति तथा कार्यक्रममा उल्लेख छ । 

यसैगरी पूर्वाधार विकासमा पनि नीति तथा कार्यक्रमले जोड दिएको छ । गाउँपालिका स्तरीय सडक तथा यातायात गुरुयोजना अनुसार सडक नालीको निर्माण र मर्मत सम्भार गर्ने, सडक सञ्जाल विस्तार र स्तरोन्नतिका लागि संघ प्रदेश सरकारसँग आवश्यक समन्वय गर्नुका साथै कार्यक्रम सञ्चालन गरिने, अत्यावश्यक स्थानमा पुलपुलेसा र कल्भर्ट निर्माणलाई निरन्तरता दिइने विषयलाई पनि नीति तथा कार्यक्रमले समेटेको छ । गाउँसभाको आजको बैठकमा वडा नम्बर ६ का वडा अध्यक्ष लवराज खरेल, वडा नम्बर ७ का वडा अध्यक्ष रामलखन थारु र वडा ९ का वडा अध्यक्ष सोहनलाल थारुले आआफ्नो मन्तव्य राखेको प्रमुख प्रशासकीय अधिकृत दानबहादुर एडीले बताए । नीति तथा कार्यक्रम र बजेटमाथि आगामी १४ गते बस्ने बैठकमा दफावर छलफल हुने प्रमुख प्रशासकीय अधिकृत एडीले बताए ।