रौतहट । रौतहटस्थित मौलापुर नगरपालिकाको मेयर पद गुमेको छ।

२०७९ वैशाख ३० गते भएको स्थानीय तहको निर्वाचनमा नेकपा एमालेबाट मेयर पदमा निर्वाचित भएकी रिनाकुमारी साहको पद गुनेको हो। मेयर साहले एमाले पार्टी त्याग  गरेपछि उनको मेयर पद गुमेको निर्वाचन आयोगले जनाएको छ।

मेयर साहले एमाले छाडेर आफ्ना पति प्रभु साहको आम जनता पार्टी प्रवेश गरेपछि उनको पद गुमेको निर्वाचन आयोगले जनाएको छ। उनले पार्टी त्याग गरेको जानकारी एमालेले आयोगलाई गराएपछि आयोगले उनको पद खोसेको हो। 

निर्वाचन आयोगले साहले दल त्याग गरेकाले उनको पद गुमेसँगै मौलापुर नगरपालिकाको मेयर पद रिक्त भएको सूचना निकालेको हो।