काठमाडौँ । नेपाल प्रहरीले बदलिँदो परिस्थितिअनुसार प्रहरी सेवा प्रभावकारी बनाउन स्वचालित मूल्याङ्कन प्रणाली लागू गरेको छ ।

प्रहरी महानिरीक्षकलाई दैनिक रिपोर्टिङ हुने गरी उक्त प्रणाली सुरु गरिएको र आज जिल्लाबाट रिपोर्टिङ भइसकेको नेपाल प्रहरीका केन्द्रीय प्रवक्ता, प्रहरी नायब महानिरीक्षक अविनारायण काफ्लेले राससलाई जानकारी दिए ।

उक्त प्रणालीका लागि ७० वटा सूचक बनाइएको र प्रहरीको तल्लो इकाइबाट बिहान ९ः०० बजेभित्र उक्त प्रणालीमार्फत देशभरको विवरण प्रहरी महानिरीक्षकसम्म आइपुग्ने उनले जानकारी दिए ।

प्रहरीको अन्वेषण विभागले अध्ययन गरेर उक्त प्रणाली तयार पारी पुस १ गतेदेखि लागू गरिएको हो । उक्त प्रणालीका आधारमा हरेक प्रहरी कार्यालयको मूल्याङ्कन हुनेछ । त्यसैका आधारमा कुन कार्यालयले कति नम्बर पायो भनेर सबैले देख्न सकिने र त्यही आधारमा पुरस्कार र दण्डकोसमेत व्यवस्था गरिने उनले बताए ।

प्रवक्ता काफ्लेले भने, “यसले एक त प्रहरीहरूसमेत प्रतिस्पर्धामा सहभागी हुनेछन् भने अनुशासनहीन क्रियाकलापमा संलग्न हुनबाट रोक्न, सेवा प्रभावकारी बनाउन, अपराध अनुसन्धान प्रभावकारी बनाउन, गस्ती परिचालन, राजस्व बढाउने काममा सक्रिय हुनलाई सहयोग गर्नेछ ।” ७० वटा सूचक बनाएर कार्यान्वयन गरिएको र त्यसमा नम्बरिङसमेत गरिनेछ । जनताका गुनासा कति सम्बोधन गरियो रु कसरी गरियो सबै कुरा समावेश हुने गरी प्रणालीको विकास गरिएको छ ।

उनका अनुसार आज दिनभरिको गतिविधि भोलि बिहान ७ः०० बजे प्रहरी र गणले प्रदेश प्रहरीलाई रिपोर्ट गर्नेछन् । प्रदेशले एकीकृत गरेर हेडक्वार्टर प्रदेश समन्वय विभागलाई पठाउनेछ र विभागले बिहान ९ः०० बजे प्रहरी महानिरीक्षकको सचिवालयमा रिपोर्ट गर्नेछ ।

यसले चेनअफ कमान्डमा नबस्ने, सरुवा बढुवाको भनसुन गर्ने र नीति नमान्नेलाई कारबाही गर्न र राम्रो गर्नेलाई पुरस्कृत गर्न सहज हुने प्रहरीको विश्वास छ ।