काठमाडौं ।  गृहमन्त्री रवि लामिछानेविरुद्ध सर्वोच्च अदालतमा परेको रिटको आज सुनुवाइ हुँदैछ । पदबाट निलम्बन गर्न माग गर्दै सर्वोच्चमा परेको रिट निवेदनमाथि आज फेरि सुनुवाइ हुने भएको हो ।

लामिछानेलाई निलम्बन गरी उनीमाथि सहकारी प्रकरणको अनुसन्धान गर्नुपर्ने माग राखी गत जेठ १४ गते अधिवक्ता अनुपम भट्टराईले दायर गरेको रिटमा अन्तरिम आदेश जारी गर्ने वा नगर्ने भन्नेबारे सर्वोच्च अदालतमा सुनुवाइ भइरहेको छ ।

यो रिटमा न्यायाधीशहरू सपना प्रधान मल्ल र सारंगा सुवेदीको इजलासले ‘हेर्दाहेर्दै’ मा राखेर आज सुनुवाइ गर्ने आदेश गरेको थियो ।

रिटमा कास्की, रुपन्देही र चितवनमा लामिछानेविरुद्ध सहकारी ठगीमा मुद्दा दायर नभएको भनेर महान्यायाधिवक्ता कार्यालयले लेखेको पत्रको कानूनी वैधतामाथि पनि प्रश्न उठाउँदै महान्यायाधिवक्ता दिनमणि पोखरेललाई पनि विपक्षी बनाइएको छ ।

यता पुष्पकलम दाहाल प्रचण्ड नेतृत्वको सरकार बदलिने समीकरण बनेसँगै लामिछाने सरकारबाट स्वतः बाहिरिने देखिएको छ । र पनि उनीमाथिको सुनुवाइले विशेष अर्थ राखेको छ । 

उनी विरुद्ध छानबिन गर्न संसदीय समिति पनि बनेको छ । सत्ताको नयाँ समीकरण अनुसार दुई ठूला पार्टी नेपाली कांग्रेस र नेकपा एमालेले सत्ता चलाउने छन् ।