काठमाडौं  । १५ वर्ष पहिला बोक्सीको आरोप लागाई कुटपिट गरी हत्या गरेको  घटनाका  दुई जना फरार अभियुक्तहरुलाई प्रहरीले पक्राउ गरेको छ। 

उपत्यका अपराध अनुसन्धान कार्यालयले काभ्रेको रोशी गाउँपालिका-३ का ४४ वर्षीय टंकबहादुर मगर र ४२ वर्षीय सन्तबहादुर मगरलाई पक्राउ गरेको हो ।

२०६५ सालमा रोशी गाउँपालिका-३ का जनकबहादुर मगरलाई कुटपिट गरी हत्यापछि फरार भएका उनीहरूलाई पक्राउ गरिएको काठमाडौँ उपत्यका अपराध अनुसन्धान कार्यालयले जनाएको छ।

पक्राउ परेका दुवै जनकबहादुरका भतिजा नाता पर्ने व्यक्ति हुन् । २०६५ साल असोज २९ गते जनकबहादुरको हत्या भएको थियो।

हत्यापछि फरार रहेका दुवैलाई पक्राउ गरी आवश्यक कारबाहीको लागि आज जिल्ला अदालत काठमाडौँमा बुझाइएको उपत्यका अपराध अनुसन्धान कार्यालयले जनाएको छ।