काठमाडौं। प्रधानमन्त्री केपी शर्मा ओली आज  चीनको औपचारिक भ्रमणमा निस्किएका छन्। जनवादी गणतन्त्र चीनका राष्ट्रपति सी चिनफिङको मैत्रीपूर्ण निमन्त्रणामा उनी साङ्घाई सहयोग सङ्गठन (एससीओ) शिखर सम्मेलनमा भाग लिन २३ सदस्यीय नेपाली प्रतिनिधिमण्डलको नेतृत्व गर्दै तियान्जिनतर्फ प्रस्थान गरेका हुन्।

त्रिभुवन अन्तर्राष्ट्रिय विमानस्थलको अतिविशिष्ट कक्षमा उपप्रधानमन्त्री प्रकाशमान सिंह, गृहमन्त्री रमेश लेखक, परराष्ट्रमन्त्री डा. आरजु राणा देउवा लगायत उच्च अधिकारीहरूले उनलाई बिदाइ गरे। यसअघि नेपाली सेनाको एक टुकडीले उनलाई सम्मान गारत अर्पण गरेको थियो।

भ्रमणका मुख्य कार्यक्रम

सेप्टेम्बर १: प्रधानमन्त्री ओलीले तियान्जिनमा हुने एससीओ शिखर सम्मेलनलाई सम्बोधन गर्नेछन्। सोही अवसरमा उनले चीनका राष्ट्रपति सी चिनफिङसँग पनि भेटवार्ता गर्नेछन्।

सेप्टेम्बर २स् उनले बेइजिङमा चीनका उपराष्ट्रपति हान झेङसँग भेटवार्ता गर्नेछन्।

सेप्टेम्बर ३: प्रधानमन्त्री बेइजिङमा आयोजना हुने ८०औँ वार्षिकोत्सवका स्मृति कार्यक्रममा सहभागी हुनेछन्।

भ्रमणका क्रममा प्रधानमन्त्री ओलीले विभिन्न राष्ट्र तथा सरकार प्रमुखहरूसँग द्विपक्षीय भेटवार्ता गर्ने कार्यतालिका रहेको छ। यसमा रुसी राष्ट्रपति भ्लादिमिर पुटिन, माल्दिभ्सका राष्ट्रपति डा.मोहमद मिज्जु, कम्बोडियाका प्रधानमन्त्री डा. सोमदेक मोहा बोरभोर तिपाहदे हुन महानेट, लाओसका प्रधानमन्त्री सोनेसाइ सिपानडोन, र भियतनामका प्रधानमन्त्री फाम मिन चिङसँगको भेट तय भएको छ।

नेपाल सन् २०१६ देखि एससीओको संवाद साझेदार रहँदै आएको छ। प्रधानमन्त्री ओलीसँग उनकी धर्मपत्नी राधिका शाक्य, शिक्षामन्त्री रघुजी पन्त, पर्यटनमन्त्री बद्रीप्रसाद पाण्डे, नेपाली कांग्रेसका सांसद पूर्णबहादुर खड्का लगायतका उच्चस्तरीय अधिकारीहरू रहेका छन्। प्रधानमन्त्री ओली भदौ १८ गते स्वदेश फर्कने कार्यक्रम रहेको छ।