नेपालगञ्ज । माओवादी केन्द्रका अध्यक्ष एवम् पूर्व प्रधानमन्त्री पुष्पकमल दाहाल प्रचण्डले जनतासंगको सम्बन्ध सुदृढ गर्ने उद्देश्यका साथ जनताका कुरा सुन्न देश दौडाहामा रहेको बताएका छन् । 

नेकपा माओवादी केन्द्र जिल्ला समन्वय समिति बाँकेले आज नेपालगञ्जमा आयोजना गरेको नागरिक अन्तर संवाद कार्यक्रममा बोल्दै अध्यक्ष प्रचण्डले विगतमा केही गल्ती भएको समिक्षासहित पार्टी रुपान्तरणको निम्ति अघि बढेको उल्लेख गरे । प्रचण्डले मुलुक ठूलो दुर्घटनामा जाने अनुभूत गर्दै पार्टीलाई सच्याएर जानुपर्दछ भन्ने आत्मबोध भएपछि जनताको बीचमा गइरहेको बताए । उनले जनताको बीचमा जाँदा उर्जा प्राप्त भइरहेको समेत बताए । अध्यक्ष प्रचण्डले चैत १५ गतेको प्रदर्शनबाट राजाबादीहरुको चरित्र छर्लङ्ग भएको जिकिर समेत गरे । 

कार्यक्रममा माओवादी केन्द्रका नेताहरु नारायणकाजी श्रेष्ठ, कृष्ण बहादुर महरा, अग्नि सापकोटा, पम्फा भुसाल, देव गुरुङ लगायतको उपस्थिति थियो । माओवादी केन्द्रका बाँके जिल्ला संयोजक नरेन्द्र पाण्डे जेम्सको सभापतित्वमा कार्यक्रम सम्पन्न भएको थियो ।

कार्यक्रममा नागरिक तहबाट विभिन्न प्रश्न र सुझाबहरु आएका थिए । ती प्रश्न र सुझाबलाई आत्मसाथ गरेर पार्टी अघि बढ्ने प्रचण्डको भनाई थियो ।