सुनसरी । सशस्त्र प्रहरीले श्रोत नखुलेको १ करोड १ लाख बरामद गरेको छ।

सुनसरी जिल्लाको हरिनगर गाउँपालिका-५ दुर्गा मन्दिरस्थित सशस्त्र प्रहरीको बसन्तपुर बिओपीको टोलीले गएराति घुस्की नाकाबाट हरिनगरतर्फ गइरहेको बा१६च ७६१३ नम्बर जिपमा बोराभित्र राखिएको १ करोड १ लाख रुपैयाँ बरामद गरेको सशस्त्र प्रहरी प्रधान कार्यालयले जनाएको छ।

सशस्त्र प्रहरीले बरामद गरेको रकमसँगै जिप र सुनसरी हरिनगर-५ का ३७ वर्षीय चालक ईसा अन्सारीलाई पक्राउ गरेको सशस्त्र प्रहरीले जनाएको छ।

करोडौं रकमसँगै पक्राउ परेका अन्सारीले श्रोत खुलाउन नसकेको सशस्त्र प्रहरीले जानकारी दिएको छ।

सशस्त्र प्रहरीले बरामद गरिएको १ करोड बढी रुपैयाँ , जिप र पक्राउ परेका अन्सारीलाई आबश्यक कारबाहीका लागि राजस्व अनुसन्धान कार्यालय इटहरीमा पठाउने तयारी गरेको सशस्त्र प्रहरी प्रधान कार्यालयले जनाएको छ। उक्त रकम हुण्डी कारोबारीको हुन सक्ने सशस्त्र प्रहरीको अनुमान रहेको छ।