डुडुवा (बाँके) । डुडुवा गाउँपालिका, बाँकेमा आर्थिक वर्ष २०८२/०८३ मा सञ्चालन तथा सम्पादन गरिएका एकीकृत स्वास्थ्य कार्यक्रमको वार्षिक समीक्षा गरिएको छ । गाउँपालिकाको स्वास्थ्य शाखाको आयोजनामा शुक्रबार सम्पन्न समीक्षा कार्यक्रममा पालिका अन्तर्गतका स्वास्थ्य संस्थाले वर्षभरि सञ्चालन गरेका स्वास्थ्य सेवा तथा कार्यक्रमको प्रगति, उपलब्धि, समस्या, चुनौती र आगामी कार्ययोजनाबारे विस्तृत छलफल गरिएको हो ।

कार्यक्रममा आर्थिक वर्ष २०८२/०८३ मा गाउँपालिका अन्तर्गतका स्वास्थ्य संस्थाबाट प्रदान गरिएका स्वास्थ्य सेवाको अवस्था, सेवा प्रवाहको गुणस्तर, लक्षित स्वास्थ्य कार्यक्रमको प्रगति, स्वास्थ्य सूचकको अवस्था तथा कार्यक्रम कार्यान्वयनका क्रममा देखिएका समस्या र सुधार गर्नुपर्ने पक्षबारे समीक्षा गरिएको स्वास्थ्य शाखा प्रमुख सिताराम चौधरीले बताए ।

समीक्षाका क्रममा मातृ तथा नवजात शिशु स्वास्थ्य, बाल स्वास्थ्य तथा खोप, परिवार नियोजन, पोषण, क्षयरोग, नसर्ने रोग, ज्येष्ठ नागरिक स्वास्थ्य, महिला स्वास्थ्य, किशोरकिशोरी स्वास्थ्य, सरसफाइ तथा स्वास्थ्य प्रवद्र्धनलगायत कार्यक्रमको प्रगति प्रस्तुत गरिएको थियो ।

कार्यक्रममा पालिका अन्तर्गतका ६ वटै स्वास्थ्य संस्थाका प्रमुख तथा प्रतिनिधिले आ–आफ्नो संस्थाबाट वर्षभरि सम्पादन भएका गतिविधि, सेवा लिने सेवाग्राहीको अवस्था, प्राप्त उपलब्धि तथा कार्यक्रम सञ्चालनका क्रममा देखिएका समस्या र चुनौतीबारे प्रस्तुतीकरण गरेका थिए ।

समीक्षाका क्रममा स्वास्थ्य सेवाको पहुँच विस्तार, सेवाको गुणस्तर सुधार, अभिलेख तथा प्रतिवेदन प्रणालीलाई व्यवस्थित बनाउने र लक्षित वर्गसम्म स्वास्थ्य सेवा प्रभावकारी रूपमा पुर्‍याउने विषयमा आगामी कार्ययोजना समेत तयार गरिएको शाखा प्रमुख चौधरीले बताए ।

समीक्षा कार्यक्रममा गाउँपालिका उपाध्यक्ष शाहिदा बानोले डुडुवाले स्वास्थ्य क्षेत्रमा विशेष रणनीतिका साथ काम गर्दै आएको बताउँदै पालिकाका कुनै पनि नागरिक स्वास्थ्य सेवाबाट वञ्चित हुन नदिने गरी प्रभावकारी सेवा प्रवाहमा जोड दिइएको बताइन् ।

उनले स्वास्थ्य सेवा नागरिकको आधारभूत अधिकार भएकाले स्थानीय सरकारले स्वास्थ्य सेवालाई थप प्रभावकारी, पहुँचयोग्य र गुणस्तरीय बनाउन प्राथमिकता दिएको बताइन् ।

कार्यक्रममा निमित्त प्रमुख प्रशासकीय अधिकृत अशोककुमार पाण्डेय, जनप्रतिनिधि, स्वास्थ्य शाखाका कर्मचारी, स्वास्थ्य संस्थाका प्रमुख तथा स्वास्थ्यकर्मीहरूको सहभागिता रहेको थियो ।

वर्षभरि उत्कृष्ट सेवा प्रवाह तथा कार्यसम्पादनका आधारमा होलिया स्वास्थ्य चौकी प्रथम, बनकट्टी स्वास्थ्य चौकी दोस्रो र बेतहनी स्वास्थ्य चौकी तेस्रो भएका छन् । विभिन्न स्वास्थ्य सूचकमा देखिएको प्रगतिका आधारमा उत्कृष्ट स्वास्थ्य संस्थाका रूपमा घोषणा गरी ती स्वास्थ्य चौकीलाई सम्मान गरिएको स्वास्थ्य शाखाका विरेन्द्र घलेले जानकारी दिए ।

पालिकाले निर्धारण गरेको लक्ष्य अनुसार अधिकांश स्वास्थ्य कार्यक्रममा करिब ९० प्रतिशत कभरेज हासिल भएको स्वास्थ्य शाखाले जनाएको छ । विगत वर्षका उपलब्धि, कमजोरी तथा सिकाइको वस्तुनिष्ठ समीक्षा गरी आगामी आर्थिक वर्षका कार्यक्रमलाई थप प्रभावकारी बनाउन समीक्षा कार्यक्रम महत्वपूर्ण भएको शाखाले जनाएको छ ।

स्वास्थ्य संस्थाबीचको समन्वय, नियमित अनुगमन तथा तथ्यमा आधारित योजना निर्माणलाई थप प्रभावकारी बनाउने विषयमा समेत छलफल गरिएको थियो । कार्यक्रममा स्वास्थ्य कार्यक्रम कार्यान्वयनका क्रममा देखिएका समस्या समाधानका लागि विभिन्न सुझाव समेत प्रस्तुत गरिएको थियो ।

सहभागीहरूले स्वास्थ्य संस्थामा आवश्यक औषधि तथा उपकरणको पर्याप्त उपलब्धता, स्वास्थ्यकर्मीको क्षमता अभिवृद्धि, नियमित स्वास्थ्य शिक्षा तथा जनचेतना कार्यक्रम सञ्चालन, अभिलेख व्यवस्थापनमा सुधार र स्वास्थ्य सेवाको नियमित अनुगमनलाई थप प्रभावकारी बनाउनुपर्ने सुझाव दिएका थिए ।