नरैनापुर। बाँकेको नरैनापुर गाउँपालिका वडा नं.३ स्थित गेग्ली गाउँमा आज बिहान भीषण  आगलागी हुँदा १५ वटा फुसको छानो भएका कच्ची घर तथा गोठ जलेका छन् । 

आज बिहान ४ :५० बजेतिर आगलागी भएको सूचना प्राप्त हुनासाथ नरैनापुरस्थित सशस्त्र प्रहरीको सीमा सुरक्षा गुल्म , बिओपी कटकुइँया र  इलाका प्रहरी कार्यालय भगवानपुरसहित विभिन्न युनिटमा रहेका प्रहरी टोली घटनास्थलमा खटिएको थियो।

नेपाल प्रहरी ,सशस्त्र प्रहरी, स्थानीय बासिन्दा तथा दमकलको संयुक्त प्रयासमा करिब ५ घण्टापछि बिहान साढे ९ बजे आगो पूर्ण रूपमा नियन्त्रणमा ल्याइएको प्रहरीले जनाएको छ।

आगलागीबाट भएको क्षतिको विस्तृत विवरण संकलन भइरहेको र घटनाको कारणबारे अनुसन्धान जारी रहेको प्रहरीले जनाएको छ।