काठमाडौं । चितवन राइनोजले नेपाल प्रिमियर लिग–(एनपीएल) मा शानदार सुरुवात गरेको छ। रबि बोपाराको अर्धशतक र सैफ अली जैबको आक्रमक ब्याटिङको मद्दतमा चितवनले कर्णाली याक्सलाई चार विकेटले पराजित गर्दै पहिलो खेलमै जित दर्ता गर्‍यो। १६७ रनको लक्ष्य चितवनले १९.१ ओभरमा ६ विकेट गुमाएर पूरा गर्‍यो।

चितवनका बोपाराले ३५ बलमा ५१ रन, ओपनर दीपक बोहराले ४२ रन र सैफ अली जैबले १६ बलमा २ चौका र ४ छक्कासहित ३८ रन जोडे। कर्णालीका कप्तान सोमपाल कामीले २ विकेट लिए।

यसअघि टस हारेर पहिले ब्याटिङ उतरेको कर्णालीले ३ विकेटमा १६६ रन बनाएको थियो। भारतीय ओपनर पान्चलले ४८ बलमा ७ चौका र ६ छक्कासहित प्रभावशाली इनिङ खेल्दै डाउडसँग ६१ र मार्क वाटसँग ६३ रनको साझेदारी गरेका थिए। पवन सर्राफले अन्त्यतिर अविजित २७ रन थपे।

एनपीएलमा कर्णालीविरुद्ध चितवनको यो पहिलो जीत हो। पहिलो संस्करणमा दुवै भेटमा कर्णाली नै विजयी भएको थियो।