काठमाडौं । काठमाडौंबाट रामेछापका लागि ११ यात्रु लिएर उडान भरेको सीता  एयरको जहाजमा प्राविधिक समस्या देखिएपछि काठमाडौं फर्काएर आकस्मिक अवतरण गराइएको छ।

आज बिहान साढे ९ बजे त्रिभुवन अन्तर्राष्ट्रिय विमानस्थलबाट रामेछापका लागि उडेको सीता एयरको ९०६ कल साइनको जहाज २० मिनेटमै काठमाडौं फर्किएर अवतरण गरेको त्रिभुवन विमानस्थल कार्यालयले जनाएको छ।

जहाजको हाइड्रोलिकमा समस्या आएपछि पुनः काठमाडौं फर्काइएर सुरक्षित अवतरण गराइएको विमानस्थलले जानकारी दिएको छ।

त्यस्तै आज बिहान काठमाडौंबाट भारतको बनारस उड्ने तयारी गरेको बुद्द एयरको जहाजमा प्राविधिक समस्या आएपछि उडान रद्द गर्दै जहाजलाई पार्किङ वेमा फर्काइएको छ।

बनारस उड्न तयारी अवस्थामा रहेको बुद्द एयरको एटीआर ७२ (बीएचए १६१) जहाजमा इन्डिकेटरले एक्कासी प्राविधिक समस्या देखाएपछि जहाजलाई पार्किङ वेमा लगिएको त्रिभुवन विमानस्थल कर्यालयले जनाएको छ।