काठमाडौँ । विश्वकप फुटबलमा उपाधि दाबेदार इङ्गल्याण्डले विजयी सुरुआत गरेको छ। बिहीबार बिहान सम्पन्न समूह एलको खेलमा इङ्गल्याण्डले क्रोएसियालाई ४–२ गोल अन्तरले पराजित गर्दै महत्वपूर्ण तीन अंक हात पारेको हो।

इङ्गल्याण्डको जितमा ह्यारी केनले दुई गोल गरे भने जुड बिलिङघम र मार्कस रास्फोर्डले एक–एक गोल थपे। क्रोएसियाका लागि मार्टिन बाटुरिना र पिटर मुसाले एक–एक गोल फर्काए।

रोमाञ्चक बनेको खेलको पहिलो हाफ २–२ को बराबरीमा सकिएको थियो। तर दोस्रो हाफमा इङ्गल्याण्डले उत्कृष्ट प्रदर्शन गर्दै थप दुई गोल गरेको थियो।

यस जितसँगै इङ्गल्याण्ड समूह एलको शीर्ष स्थानमा उक्लिएको छ।

यता, सोही समूहको अर्को खेलमा घानाले पानामामाथि १–० को सनसनीपूर्ण जित निकालेको छ। निर्धारित ९० मिनेटसम्म गोलरहित बराबरी रहेको खेलको इन्जुरी समयको पाँचौँ मिनेटमा कालेब यिरेन्केयीले निर्णायक गोल गरे।

ब्रान्डन थोमसको पासमा कालेबले गोल गर्दै घानालाई महत्वपूर्ण तीन अंक दिलाए। पानामाले खेलभर ५६ प्रतिशत बल नियन्त्रणमा राखे पनि गोल गर्न नसक्दा हार बेहोर्न बाध्य भयो।

यो जितसँगै घाना तीन अंकसहित समूह एलको दोस्रो स्थानमा रहेको छ भने इङ्गल्याण्ड गोल अन्तरका आधारमा शीर्ष स्थानमा कायम छ।