काठमाडौं । फिफा विश्वकप २०२६ अन्तर्गत समूह चरणका खेलहरूमा अपेक्षाकृत कमजोर मानिएका टोलीहरूले प्रभावशाली प्रदर्शन गर्दै बलिया प्रतिद्वन्द्वीलाई अंक बाँड्न बाध्य पारेका छन्। 

समूह ‘एच’ मा विश्वकप डेब्यु गरिरहेको केप भर्डेले युरोपेली च्याम्पियन स्पेनलाई गोलरहित बराबरीमा रोक्दै ठूलो सनसनी मच्चायो। एटलान्टामा भएको खेलमा स्पेनले बलमाथि अधिकांश समय नियन्त्रण राखे पनि केप भर्डेको अनुशासित रक्षापङ्क्ति भेद्न सकेन। 

यही समूहको अर्को खेलमा साउदी अरेबिया  र उरुग्वेले १–१ को बराबरी खेले। खेलको ४१औँ मिनेटमा अब्दुलेलाह अल-अम्रीको गोलमार्फत साउदी अरेबियाले अग्रता लिए पनि उरुग्वेका म्याक्सी अराउजोले ८०औँ मिनेटमा गोल गर्दै टोलीलाई हारबाट जोगाए। 

समूह ‘जी’ मा बेल्जियम र इजिप्टले १–१ को रोमाञ्चक बराबरी खेले। इमाम अशोरको गोलबाट इजिप्टले पहिलो हाफमा अग्रता लिए पनि दोस्रो हाफमा मोहम्मद हानीको आत्मघाती गोलका कारण बेल्जियम खेलमा फर्कियो। त्यसपछि दुवै टोलीले जितका लागि प्रयास गरे पनि थप गोल हुन सकेन। 

यी नतिजासँगै विश्वकप २०२६ को प्रारम्भिक चरणमै उपाधि दाबेदार टोलीहरू दबाबमा परेका छन् भने केप भर्डे, इजिप्ट र साउदी अरेबियाजस्ता टोलीहरूले आफूहरूलाई हल्का रूपमा लिन नहुने स्पष्ट सन्देश दिएका छन्।